可選擇「整課模式」及「逐句模式」瀏覽,並提供音檔聆聽;
點擊課文內藍字可查看語詞拼音、釋義。
吂轉寒,
苗栗銅鑼就落雪了!
這係「杭菊雪」。
十一月个杭菊開到榮榮,
像大雪落過,
滿坪雪白。
民國五、六十年,
臺灣引進杭菊。
銅鑼九湖因為地質、氣候適合,
就種當多个杭菊。
杭菊經濟價值高,
毋過愛異久來種,
又愛恁多工,
實在無恁該!
後來中國个菊花打壞行情。
後生人又毋肯留在莊下,
杭菊產業就衰弱忒了。
這幾年仔休閒產業時行,
銅鑼杭菊又再過返生。
逐年花開,
人客就會來摎杭菊共下翕相。
這偎山鄉鎮加添了色彩,
像茶罐裡肚添入滾水以後,
活生个杭菊花。
時節到秋冬,
苗栗銅鑼落雪了!
杭菊花鋪好歡迎个地毯,
等等你來尞。