可選擇「整課模式」及「逐句模式」瀏覽,並提供音檔聆聽;
點擊課文內藍字可查看語詞拼音、釋義。
「妹仔賊、妹仔賊、
豬肉青菜外家扐,
番瓜覆菜做盡愛……」
還細𠊎盡好聽阿公編个童謠。
阿公問:「你大了會係妹仔賊無?」
𠊎愐毋解,
拿屋下食屋下仰會分人喊做賊呢?
大了嫁到學老莊,
盡思念个係阿姆个覆菜炆桂竹筍。
逐年割大菜、滷鹹菜、做覆菜係大事情,
大菜晒燥亼鹽,
放落醃缸肚,
頂高正過矺大石牯,
在屋簷下晟日頭,
變做鹹菜。
鹹菜晾到半燥就揤落酒盎,
倒漀放到明年正開盎。
經過鹽滷、日頭炙,
一皮一皮揤落盎,
再用時間變做好芬芳,
這皮覆菜摎𠊎醹醹个客家情感綯緪緪,
一盎覆菜有萬種味道萬項情。